Tge è ina recessiun da la schunschiva?

Recessiuns da la schunschiva pon esser la consequenza da blers facturs d’influenza. Persunas cun in tip da schunschiva pli satigl èn per princip pli fragilas. Plinavant giogan ina retscha da facturs da cumportament ina rolla decisiva. Per exempel maina il fregar savens cun il barschun da dents u il purtar piercings a blessuras che pon manar, durant lur guariziun, ad ina reducziun da l’ur da la schunschiva.

Ulteriurs motivs èn tals tractaments ortodontics che spustan ils dents vers anor. Latiers po la fixaziun exteriura dals dents sa dissolver e la schunschiva sura po daventar pli satiglia. Medemamain èn fimar ed il consum da snus facturs d’influenza decisivs, perquai ch’il consum da tabac reducescha la resistenza da la schunschiva.

La frequenza da recessiuns da la schunschiva crescha cun la vegliadetgna. Dapli che 50 pertschient da la populaziun creschida mussan recessiuns da la schunschiva.

La curuna dal dent è cuvrida d’emagl dals dents (emagl). Suten sa chatta il dentin e puspè suten il gnerv dal dent (pulpa). Effectivamain consista la pulpa d’in gnerv, d’avainas ed in uschenumnà tessì colliant. Entant che l’emagl è senza gnervs e cun quai senza sentiment, vegn il dentin che sa chatta suten provedì da fibras da gnervs. La surfatscha da la ragisch dal dent è perquai era sensibla cunter mal.

Il dentin è la part principala da la ragisch. La ragisch vegn supplementarmain cuvrida d’ina rasada dira, l’uschenumnada pel da la ragisch (cement da la ragisch). Il dent è per lung da sia entira surfatscha da la ragisch fixà cun fibras d’enragischaziun (fibras desmodontalas) en l’oss da la missella. Questas fibras èn d’ina vart francadas en il dentin da la ragisch e da l’autra vart en l’oss da la missella.

La ragisch dal dent è pli lunga che la curuna dal dent. Oravant tut han ils dents chanins en la missella sura (dents dal spalancun) il pli savens fitg lungas ragischs.

Sco recessiun da la schunschiva designesch’ins per princip la sminuziun da la schunschiva sin la vart exteriura da la dentadira. Pertutgads na pateschan en tals cas betg supplementarmain d’ina parodontitis.

La parodontitis po dentant manar en in stadi avanzà era a la reducziun da l’ur da la schunschiva. Pir in’examinaziun en la pratica da dentist fa cler als pertutgads, tge motiv ch’è responsabel tar els per la sminuziun da la schunschiva.

Ultra da quai vegn observada ina sminuziun da la schunschiva suenter il tractament d’ina parodontitis. Quella è en tals cas dentant giavischada, perquai che las tastgas da la schunschiva nungiavischadas pon vegnir reducidas tras la reducziun da l’ur da la schunschiva.

Sco consequenza da l’inflammaziun da l’ur da la schunschiva (gingivitis) pon las fibras d’enragischaziun e l’oss da la missella sa sminuir. Enstagl d’in apparat da fibras saun resulta per lung dal dent in’uschenumnada tastga da la schunschiva. La surfatscha da la ragisch ch’è situada là è cuvrida cun placcas bacterialas (placca e tartagl).

La sminuziun da las fibras d’enragischaziun e da l’oss da la missella po chaschunar ch’ils dents sa movan pli fitg. Sche la malsogna na vegn betg scuvrida e tractada, po la sminuziun cuntinuar uschè fitg ch’ins na po betg pli duvrar ils dents per mastgar e ch’els ston vegnir tratgs (extratgs).

Var 40 pertschient da l’umanitad pateschan da parodontitis. Per la populaziun creschida vegn stimà che var 70% da la perdita dals dents è oz d’attribuir a la parodontitis.

Emprendai dapli davart las raschuns, las consequenzas, la diagnosa, la terapia e la prevenziun da la parodontitis sut: www.periodontal-health.com.