Diagnosa da la recessiun da la schunschiva

Entant che tar giuvenils èn savens pertutgads ils dents incisivs centrals en la missella sut, mussan creschids pli savens recessiuns da la schunschiva vi da lur dents laterals en la missella sura.

L’agen giudicament da la schunschiva, per exempel a chasa avant il spievel, è insuffizient per in giudicament correct. Senza examinaziun clinica en la pratica da dentist n’èsi betg pussaivel d’identifitgar il motiv per la sminuziun da la schunschiva.

Pir l’examinaziun clinica correcta en la pratica da dentist cun in’uschenumnada sonda da schunschiva (sonda parodontala) po dar scleriment, sche la schunschiva è sauna, sch’ina inflammaziun da la schunschiva (gingivitis) u gia ina malsogna da la fixaziun dals dents (parodontitis) è avant maun.

Tar recessiuns da la schunschiva vegnan distinguids quatter grads da grevezza, perquai che las pussaivladads da tractament sa laschan era deducir da quels.

Ina recessiun simpla è avant maun, cura che la reducziun da l’ur da la schunschiva n’è anc betg avanzada fin a la mucosa da la bucca movibla. Tar il segund grad da grevezza è la recessiun gia penetrada en la mucosa movibla. En omadus cas è la correctura da l’ur da la schunschiva pussaivla cun in intervent chirurgic.

Cunquai che tar ils grads da grevezza 3 e 4 è era gia vegnì sminuì l’oss da la missella tranter ils dents, na pon las recessiuns da la schunschiva existentas là era betg vegnir curregidas cumplettamain cun mesiras chirurgicas.

Cun l’examinaziun da basa parodontala duai vegnir constatà en in curt temp, sch’igl existan problems da la schunschiva. Uschia pon ins remartgar en moda simpla ina gingivitis u scuvrir ina parodontitis.

Cun ina sonda da schunschiva (sonda parodontala) mesir’ins tar lieus tschernids plain resguard e cun ina precisiun dad in millimeter la profunditad da penetraziun a l’ur da la schunschiva.

Suenter questa examinaziun curta exequesch’ins scleriments ulteriurs mo lura, sch’ins chatta segns per ina sminuziun da la fixaziun dals dents. Quests scleriments cumpiglian l’uschenumnà status parodontal e radiografias supplementaras.

Tar l’examinaziun clinica cun la sonda da schunschiva (sonda parodontala) mesir’ins tar fin sis lieus per dent cun ina precisiun dad in millimeter la profunditad da penetraziun da la sonda en la tastga da la schunschiva. Effectivamain mesir’ins la lunghezza tranter l’ur da la schunschiva ed il fund da la tastga da la schunschiva. Ins discurra en quest connex da l’uschenumnada profunditad da sondagi. En lieus sauns vegn la profunditad da sondagi a muntar a maximalmain 3 mm. En lieus, nua che la fixaziun dals dents è gia vegnida sminuida tras la recessiun da la schunschiva, vegn la profunditad da sondagi dentant a muntar era mo a paucs millimeters.

Ultra da quai vegn fixada cun ina precisiun dad in millimeter l’autezza da l’oss da la missella (nivel d’attachment) en in uschenumnà status parodontal. In status parodontal è indispensabel per la diagnostica e per la planisaziun dal tractament d’ina recessiun da la schunschiva. Il status parodontal po vegnir registrà online gratuitamain en mintga pratica da dentist e duvrà vinavant: www.periodontalchart-online.com.

La diagnosa da la recessiun da la schunschiva po, tenor las circumstanzas, pir vegnir confermada cleramain cun las radiografias necessarias per quai. La schelta da las radiografias necessarias per diagnostitgar ina recessiun da la schunschiva fan ins pir suenter l’examinaziun clinica executada. En questa maniera po in’immissiun memia auta tras radis Röntgen vegnir impedida.

Ina diagnosa radiografica consista en il cas il pli simpel da dus maletgs (fotografias da l’ala da la dentira) ed en il cas il pli extendì d’in uschenumnà status da radiografia cun supplementarmain fin a 14 radiografias ubain d’in ortopantomogram. Las radiografias producidas ston mussar l’oss da la missella che circumdescha ils dents e pussibilitar uschia da stimar il grad da grevezza da la sminuziun da l’oss.

Tar mintga radiografia da la pratica da dentist sto la dentadira vegnir examinada tant sin caries sco sin parodontitis.

Il 1999 ha gì lieu en l’USA per l’emprima giada in lavuratori internaziunal per classifitgar las malsognas parodontalas. La pli impurtanta novaziun visavi la classificaziun europeica dal 1993 era da betg pli definir generalmain las furmas da la malsogna primarmain sin fundament da la vegliadetgna dal pazient tar l’emprima diagnosa (p.ex. parodontitis juvenila e parodontitis da creschids). Da nov han ins introducì la parodontitis cronica e la parodontitis agressiva, sco per exempel era la parodontitis che po vegnir associada cun malsognas sistemicas.

En la nova classificaziun vegn dentant dapi il 2018 betg pli differenzià tranter cronic ed agressiv. La parodontitis vegn ussa da nov descritta – sa basond sin la classificaziun da la malsogna da diabetes – cun uschenumnads stagings e gradings.