Prevenziun da la recessiun da la schunschiva

L’igiena da la bucca regulara ed exequida correctamain è la meglra metoda per allontanar las placcas bacterialas. Quai è d’ina vart il pli impurtant punct da partenza per prevegnir la gingivitis – e cun quai era la parodontitis.

L’igiena da la bucca a chasa optimala duai era adina impedir che recessiuns da la schunschiva sa furmian e, sche necessari, vegnir adattada en il decurs da la vita. Igl è fitg impurtant d’enconuscher, d’emprender e d’applitgar regularmain l’atgna metoda per in’igiena da la bucca optimala.

In’illustraziun da las tecnicas da standard sa chatta en l’internet sut www.oralhygiene-instruction.com e sut l’indicaziun directa «AC».

L’igiena da la bucca a chasa optimala vegn adina adattada individualmain en il decurs da la vita. Ella po perquai sa differenziar fitg da persuna a persuna. Cunzunt tar recessiuns da la schunschiva gia existentas è indicada in’optimaziun.

En la pratica da dentist po l’igiena da la bucca optimala vegnir instruida endretg. En blers cas vegni recumandà da nettegiar ils lieus cun ina recessiun da la schunschiva cun in moviment da scuar dal barschun da dents. Latiers vegnan las setlas passadas pliras giadas, partind da l’ur da la schunschiva, cun precauziun sur las surfatschas da la ragisch libras.

In’illustraziun da differentas tecnicas e meds auxiliars tar recessiuns da la schunschiva gia existentas sa chatta en l’internet sut www.oralhygiene-instruction.com e sut l’indicaziun directa «G».

La controlla regulara tar il dentist pussibilitescha d’intervegnir en moda professiunala uschè baud sco pussaivel, sche necessari.

Sch’ina recessiun da la schunschiva vegn percurschida baud e sch’ins cumenza gia baud cun las mesiras necessarias, po vegnir impedì cun success che ulteriuras ragischs dals dents vegnian libras.

La finamira sto restar da vegnir cun ils agens dents en l’auta vegliadetgna. «In’examinaziun memia bler è meglier ch’in tractament memia pauc!»

Suenter in tractament da la schunschiva è in success a lunga durada sur plirs onns mo lura garantì, sche pazients exequeschan in’igiena da la bucca a chasa optimala e sch’els impedeschan latiers quotidianamain che recessiuns da la schunschiva sa furmian u che lur schunschiva possia s’inflammar danovamain tras novas placcas bacterialas.

Per il success da lunga durada optimal è impurtanta ultra da quai l’assistenza da lunga durada professiunala permanenta tar l’igienicra da dents u tar l’assistenta da profilaxa, per che pussaivels problems periodics possian vegnir identifitgads ed eliminads a temp.

Nunfimaders ed anteriurs fimaders han enturn lur dents pli pauc perdita da la fixaziun dals dents che fimaders e mussan uschia pli darar recessiuns da la schunschiva.

Suenter il stop da fimar dovra la schunschiva in pau temp per sa revegnir dal consum da tabac. Intgins onns suenter il stop da fimar reageschan era anteriurs fimaders bler meglier sin il tractament da la schunschiva. Ultra da quai pon tractaments chirurgics tar recessiuns da la schunschiva mo vegnir exequids tar nunfimaders u tar anteriurs fimaders.