Dumondas frequentas

Sche Vus avais ina sminuziun da la schunschiva, pon duas situaziuns vegnir tratgas en consideraziun:

D’ina vart po la parodontitis manar en in stadi avanzà a la reducziun da l’ur da la schunschiva. La parodontitis sezza è ina malsogna d’inflammaziun ch’è sa sviluppada pervia da placcas bacterialas. Sche la parodontitis na vegn betg tractada, cuntinuescha la sminuziun da la fixaziun dals dents sut l’ur da la schunschiva. Tar la parodontitis è la sminuziun iniziala da la fixaziun dals dents betg visibla. Pir tar ina parodontitis pli avanzada va l’ur da la schunschiva enavos e Vus pudessas constatar quai sco sminuziun da la schunschiva, perquai che las surfatschas da la ragisch dals dents èn latiers era vegnidas libras e visiblas.

Da l’autra vart n’è betg mintga sminuziun da la schunschiva resultada pervia d’ina parodontitis. Vus pudessas perquai suffrir da recessiuns da la schunschiva. Quellas fissan sa furmadas per exempel tras lavar ils dents memia ferm. Tras la gronda forza vegn l’ur da la schunschiva blessà repetidamain cun il barschun da dents. Tar sia guariziun sa retira quel adina in zic pli fitg, fin che la ragisch dal dent suten vegn libra. Era sche Vus midais l’igiena da la bucca e vegnis a nettegiar Voss dents cun pli pauc forza, vegn la recessiun da la schunschiva a restar e l’ur da la schunschiva na vegn betg a crescher enavos fin a ses lieu original.

Pir l’examinaziun en la pratica da dentist po As la fin finala dar la dretga resposta.

Betg mintga recessiun da la schunschiva sto vegnir tractada. Tar pertutgads senza parodontitis po l’igiena da la bucca, sch’ins percorscha la recessiun baud tar la controlla annuala tar il dentist, gia vegnir curregida ed optimada correspundentamain. Uschia resta l’ur da la schunschiva bain cun sia recessiun, ma el na vegn betg pli exponì a novas influenzas (p.ex. al fregar cun il barschun da dents).

Tar pertutgads cun mals tar il consum da spaisas u bavrandas fraidas po in’adattaziun correspundenta dal nutriment sco era l’applicaziun regulara d’uschenumnads gels da fluorid gidar a reducir in pau ils mals.

Tar mals persistents u tar in’estetica disturbanta po vegnir tratg en consideraziun il tractament cun in intervent chirurgic. Latiers vegn l’ur da la schunschiva dals dents pertutgads mess puspè en ses lieu original.

Plinavant po vegnir tratg en consideraziun, tar culiezs dals dents libers che mussan era substanza dira dals dents consumada, da cumplettar quels puspè cun in material da plumbar.

Pir l’examinaziun en la pratica da dentist e, sche necessari, in discurs da cussegliaziun cun in medi spezialist per parodontologia po As la fin finala dar la dretga resposta.

Savens na scuvr’ins betg sez las atgnas recessiuns da la schunschiva. Dapli che 50 pertschient dals creschids mussan almain in dent cun ina recessiun da la schunschiva. Da quels èn la gronda part dals dents pertutgads senza mals.

Sche la recessiun n’è per exempel betg visibla a chasa en il spievel, po in’examinaziun en la pratica da dentist far cler, sch’ina tala è avant maun.

Impurtant per pertutgads è da savair nua che lur recessiuns da la schunschiva sa chattan, per che donns ulteriurs possian vegnir impedids là. Cunquai che recessiuns da la schunschiva existentas che na vegnan betg tractadas chirurgicamain restan durant l’entira vita, stoi ins cunzunt en la vegliadetgna pli avanzada pensar da prevegnir cun success la caries da la ragisch nungiavischada vi dals culiezs dals dents libers.

En in emprim discurs constatescha il dentist, sche Vus essas exponids a facturs da ristga eventuals. Facturs da ristga enconuschents per la recessiun da la schunschiva èn: ina tecnica sbagliada da lavar ils dents cun il barschun da dents, ina schunschiva satiglia, in tractament ortodontic, fimar, tabac senza fum (snus) u in piercing.

Plinavant vegn il dentist u l’igienicra da dents ad exequir in’uschenumnada examinaziun parodontala curta che vegn a durar sulettamain paucas minutas. Cun ina sonda da schunschiva (sonda parodontala) mesir’ins tar lieus tschernids plain resguard e cun ina precisiun dad in millimeter la profunditad da penetraziun a l’ur da la schunschiva. Il sondagi clinic cun ina precisiun dad in millimeter cun la sonda parodontala per mesirar ils urs da la schunschiva e per localisar l’oss da la missella è indispensabel per la diagnosa d’ina recessiun da la schunschiva.

Suenter questa examinaziun curta exequesch’ins scleriments ulteriurs mo lura, sch’ins chatta segns per ina sminuziun da la fixaziun dals dents. Quests scleriments cumpiglian l’uschenumnà status parodontal e radiografias supplementaras.

Sche la recessiun da la schunschiva n’è anc betg avanzada memia fitg, po il stadi original vegnir restabilì cun in intervent chirurgic.

Recessiuns da la schunschiva vegnan classifitgadas en quatter differents grads da grevezza. Tut tenor il grad da grevezza stat dentant a disposiziun mo ina tscherna limitada da pussaivladads da tractament.

Ina recessiun simpla è avant maun, cura che la reducziun da l’ur da la schunschiva n’è anc betg avanzada fin a la mucosa da la bucca movibla. Tar il segund grad da grevezza è la recessiun gia penetrada en la mucosa movibla. En omadus cas è la correctura da l’ur da la schunschiva pussaivla cun in intervent chirurgic.

Cunquai che tar ils grads da grevezza 3 e 4 è era gia vegnì sminuì l’oss da la missella tranter ils dents, na pon las recessiuns da la schunschiva existentas là era betg vegnir curregidas cumplettamain cun mesiras chirurgicas.

Suenter in tractament da la schunschiva è in success a lunga durada sur plirs onns mo lura garantì, sche pazients exequeschan in’igiena da la bucca a chasa optimala e sch’els impedeschan latiers quotidianamain che recessiuns da la schunschiva sa furmian u che lur schunschiva possia s’inflammar danovamain tras novas placcas bacterialas.

Per il success da lunga durada optimal è impurtanta ultra da quai l’assistenza da lunga durada professiunala permanenta tar l’igienicra da dents u tar l’assistenta da profilaxa, per che pussaivels problems periodics possian vegnir identifitgads ed eliminads a temp.

Suenter in tractament da la schunschiva è in success a lunga durada sur plirs onns mo lura garantì, sche pazients exequeschan in’igiena da la bucca a chasa optimala e sch’els impedeschan latiers quotidianamain che recessiuns da la schunschiva sa furmian u che lur schunschiva possia s’inflammar danovamain tras novas placcas bacterialas.

Per il success da lunga durada optimal è impurtanta ultra da quai l’assistenza da lunga durada professiunala permanenta tar l’igienicra da dents u tar l’assistenta da profilaxa, per che pussaivels problems periodics possian vegnir identifitgads ed eliminads a temp.

Las recessiuns da la schunschiva vegnan savens confundidas cun la parodontitis, perquai ch’ils dents paran en omadus cas pli lungs che normal, ma tranter las duas manifestaziuns datti differenzas essenzialas che duessan vegnir resguardadas:

Sco recessiun da la schunschiva designesch’ins d’ina vart la sminuziun da la schunschiva sin la vart exteriura da la dentadira ch’è il pli savens visibla a egl nì. Pertutgads na pateschan en tals cas betg supplementarmain d’ina parodontitis.

Da l’autra vart po la parodontitis, q.v.d. l’inflammaziun dal parodont, manar en in stadi avanzà era a la reducziun da l’ur da la schunschiva. Pir in’examinaziun en la pratica da dentist fa cler als pertutgads, tge motiv ch’è responsabel tar els per la sminuziun da la schunschiva.

Ultra da quai vegn observada suenter il tractament d’ina parodontitis ina sminuziun da la schunschiva betg mo sin la vart exteriura da la dentadira, mabain enturn l’entir dent. Quella è en tals cas dentant giavischada, perquai che las tastgas da la schunschiva nungiavischadas pon vegnir reducidas tras la reducziun da l’ur da la schunschiva.