Terapia da la recessiun da la schunschiva

Tant la prevenziun d’in ulteriur pegiurament da la recessiun da la schunschiva sco era l’execuziun d’ina terapia chirurgica eventualmain indicada pretendan ch’ins observia intginas mesiras da cumportament. D’ina vart stuess la tecnica d’igiena da la bucca vegnir optimada cun conscienza e, sche necessari, schizunt curregida. Mo uschia pon ils resultats da terapia cuntanschids vegnir mantegnids cun success.

Tar in consum da snus u tar fimaders èsi plinavant era necessari da chalar cun il consum da tabac, uschiglio na pon vegnir exequidas naginas mesiras chirurgicas per cuvrir las surfatschas da la ragisch libras.

Ina midada dal cumportament dovra temp. Visitas regularas tar l’igienicra da dents u tar l’assistenta da profilaxa permettan da discutar ils facturs d’influenza nunsauns e da planisar cun success lur midada.

Tar il nettegiament da dents professiunal exequeschan il dentist, l’igienicra da dents u l’assistenta da profilaxa in nettegiament sistematic da tut las surfatschas dals dents. Cunzunt impurtant tar la recessiun da la schunschiva è da nettegiar e da glischar las surfatschas da la ragisch libras colonisadas cun bacterias.

Medemamain vegnan allontanads tar il nettegiament da dents professiunal tut ils impediments che pon engrevgiar l’igiena da la bucca a chasa optimala. Latiers tutgan particularmain cuvridas da tartagl sur l’ur da la schunschiva sco er urs da curuna u da plumba che pendan.

D’exequir regularmain in’igiena da la bucca a chasa optimala è ina gronda sfida. Per il nettegiament conscienzius dals spazis dals dents dovri era in pau dapli temp. Plinavant n’è il nettegiament special da las recessiuns da la schunschiva betg adina simpel. Per quests lieus datti meds auxiliars d’igiena da la bucca spezials, uschenumnads barschuns cun in sulet fasch. Quels vegnan elegids separadamain per mintga situaziun en la dentadira ed il dentist, l’igienicra da dents u l’assistenta da profilaxa instrueschan co als duvrar correctamain.

Per ulteriuras infurmaziuns davart il tema instrucziun da l’igiena da la bucca era vesair https://www.oralhygiene-instruction.com.

Paucas emnas suenter il nettegiament da dents professiunal vegn la situaziun generala examinada danovamain. Tar questa controlla posteriura vegn cunzunt controllà, sche pazients pon nettegiar bain lur dents tras l’igiena da la bucca a chasa.

En il decurs dal tractament da la schunschiva emprendan pazients ina tecnica d’igiena da la bucca ch’è adattada a lur situaziun. Ina buna collavuraziun cun in’igiena da la bucca a chasa optimala decida davart il success dal tractament cumplet.

Per pudair curreger cun success ina recessiun da la schunschiva e cuvrir la surfatscha da la ragisch libra, dovri in intervent chirurgic. Tar quest tractament sut anestesia locala vegn l’atgna schunschiva fixada puspè en ses lieu original cun tagls e tecnicas da cusir adattads. Latiers po in transplantat da tessì da l’agen palat gidar a engrossar la schunschiva ed a meglierar uschia la stabilitad dal tessì.

Las cusidas applitgadas ston restar paucas emnas per la guariziun e vegnir controlladas regularmain. Durant quest temp na dastga la regiun da la plaja betg vegnir nettegiada mecanicamain cun meds auxiliars d’igiena da la bucca. Ina lavada da la bucca correspundenta cun clorhexidin duas giadas al di po surpuntar bain quest temp.

Suenter ina guariziun cumpletta dal nov ur da la schunschiva ston ils dents là vegnir nettegiads l’emprim cun precauziun e lura cun la dretga tecnica d’igiena da la bucca.

Uschè ditg che recessiuns da la schunschiva existentas na vegnan betg percepidas sco disturbantas en moda estetica, ils dents pertutgads mussan dentant ina surasensibladad, po la terapia cun plumbas dal culiez dal dent esser indicada. Ils dents respectivs vegnan suenter anc ad avair esteticamain la medema lunghezza. Latiers vegn dentant la sensibladad envers temperaturas pli fraidas reducida cleramain e la substanza dal dent che manca remplazzada.

En cas da caries sin la surfatscha da la ragisch libra vegn la ragisch cuvrida cun material da plumbar suenter avair allontanà la caries.

Suenter il tractament da la schunschiva è in success a lunga durada sur plirs onns mo lura garantì, sche pazients exequeschan in’igiena da la bucca a chasa optimala e sch’els impedeschan latiers cun success che lur schunschiva patescha ina recessiun da la schunschiva.

Per il success da lunga durada optimal èsi ultra da quai impurtant da mantegnair l’assistenza da lunga durada professiunala permanenta en la pratica da dentist, per che pussaivels problems periodics possian vegnir identifitgads ed eliminads a temp.

Il dentist svizzer vegn durant ses studi scolà e controllà teoreticamain e praticamain tar l’examinaziun ed il tractament da la recessiun da la schunschiva. Cun questa scolaziun è el abel da tractar sez cas che n’èn betg memia fitg avanzads. En curs da furmaziun supplementara ed autras occurrenzas che vegnan purschidas da las universitads, da la Societad svizra da parodontologia (SSP) ed autras instituziuns, pon questas enconuschientschas da basa vegnir profundadas.

Il tractament da cas difficils – latiers tutgan en particular recessiuns da la schunschiva pli avanzadas tar giuvenils e creschids – dumonda enconuschientschas spezialas ed in’infrastructura che garantescha in’assistenza da lunga durada parodontala nuninterrutta. Tals pazients po il dentist privat (dentist da famiglia) transferir ad in parodontolog.