Consequenzas da la recessiun da la schunschiva

Ils culiezs dals dents libers reageschan sin midadas da temperatura tras aria fraida u tar bavrandas u spaisas fraidas. Tar recessiuns da la schunschiva extendidas pon pertutgads era suffrir fitg. Ils mals per part ferms èn per regla puntgents e da curta durada.

Als pertutgads vegni recumandà da baiver bavrandas fraidas cun in strom da baiver u da cuvrir regularmain ils culiezs dals dents pertutgads cun gels da fluorid adattads. Il medem mument sto l’igiena da la bucca vegnir adattada correspundentamain e, sche necessari, curregida.

Tar mals persistents duess ins consultar il dentist per sclerir vinavant la situaziun.

La direzza pli pitschna da la substanza dal dent a la surfatscha da la ragisch dal dent libra vegn, tar ina tecnica d’igiena da la bucca sbagliada persistenta, a manar a la consumaziun (abrasiun) da la surfatscha da la ragisch. Uschia sa furman fossas che vegnan numnadas pervia da lur furma era defects en furma da cugn.

Sch’ins n’adatta betg la tecnica da lavar ils dents, pon las pizzas da las setlas d’in barschun da dents exercitar tar mintga nov moviment da scuar puspè grondas forzas sin il dentin pli lom. Uschia vegn il process da la furmaziun d’abrasiuns rinforzà vinavant.

Abrasiuns gia avanzadas cun ina profunditad da dapli ch’in millimeter pon vegnir provedidas cun ina plumba da material sintetic. Quest tractament maina per regla immediatamain ad ina reducziun da la surasensibladad dals culiezs dals dents.

Surfatschas da la ragisch libras vegnan, sco tut las autras surfatschas diras en la chavorgia da la bucca, colonisadas da placcas bacterialas. Cunquai che la substanza da la ragisch dal dent è pli loma che l’emagl da la curuna dal dent sura, po la caries sin las surfatschas da la ragisch sa furmar pli baud. Questa uschenumnada caries da la ragisch po era penetrar pli svelt en la profunditad dal dent.

Per quests motivs sto la caries da la ragisch vegnir prevegnida meglier e las surfatschas da la ragisch libras ston vegnir observadas bain tar ina recessiun da la schunschiva. Ultra da quai crescha cun la vegliadetgna era la ristga da survegnir recessiuns da la schunschiva e tras quai caries da la ragisch.

Controllas regularas en la pratica da dentist permettan ina buna assistenza professiunala dals dents pertutgads. Plinavant permetta l’utilisaziun regulara da pastas da dents cun fluorid ina prevenziun effizienta da la caries da la ragisch.

Tras la reducziun da l’ur da la schunschiva nascha l’impressiun ch’ils dents pertutgads sajan daventads pli lungs. Per regla restan quests lieus invisibels per autras persunas. Pir cura ch’ils pertutgads rian, mussan els lur recessiuns da la schunschiva – il pli savens cunter lur voluntad.

En intgins cas pon recessiuns da la schunschiva existentas era chaschunar ina suffrientscha pli gronda per motivs estetics. En quest cas è indicà in cussegliament tar il dentist e, sche necessari, era in’assegnaziun al medi spezialist per parodontologia.