Raschuns da la recessiun da la schunschiva

Savens èn la mancanza da temp u il stress il motiv per sa disar ad ina nauscha tecnica d’igiena da la bucca. Tar moviments da fregar cun il barschun da dents scuan las pizzas da las setlas adina sur il medem lieu da l’ur da la schunschiva. Uschia vegn la schunschiva blessada tras l’effect da la forza. Tar la guariziun sa retira l’ur da la schunschiva.

Per evitar recessiuns da la schunschiva sto la tecnica d’igiena da la bucca vegnir optimada e, sche necessari, curregida. Medemamain pon controllas regularas en la pratica da dentist gidar a percorscher baud eventuals segns da recessiuns da la schunschiva.

Cun duvrar barschuns da dents cun setlas diras vegn medemamain augmentada la ristga da sviluppar recessiuns da la schunschiva. Per quest motiv po vegnir recumandà in barschun da dents cun setlas mez diras u lomas.

Persunas cun in tip da schunschiva pli satigl èn per princip pli fragilas envers recessiuns da la schunschiva che persunas cun in tip da schunschiva pli gross. La furmaziun dal tip da schunschiva è predeterminada principalmain geneticamain. Perquai duessan cunzunt las persunas pertutgadas cun in tip da schunschiva satigl dar ina attenziun speziala a l’optimaziun da lur igiena da la bucca a chasa.

Tar la controlla tar il dentist po la grossezza dal tip da schunschiva vegnir constatada. Cunzunt avant il cumenzament d’in tractament ortodontic duess la ristga da sviluppar recessiuns da la schunschiva vegnir sclerida.

Tractaments ortodontics pon vegnir exequids cun apparats che sa laschan prender ora (apparats da dents) u cun apparats fixs (brackets). Cunzunt tar l’applicaziun d’apparats fixs è la ristga da sviluppar recessiuns da la schunschiva augmentada.

Recessiuns da la schunschiva sa mussan tar var 20 pertschient dals creschids che fan far in tractament ortodontic. Tar giuvenils sut 16 onns sa chattan recessiuns da la schunschiva bler pli darar, cura ch’els han terminà la correctura da la posiziun dals dents.

Recessiuns da la schunschiva pon cumparair tant durant sco era anc plirs onns suenter la fin d’in tractament ortodontic.

Fimar cigarettas ha ina varietad d’effects negativs en l’entir corp uman. Ultra da la reducziun da la spetgada da vita generala pateschan fimaders era cleramain pli savens da midadas da la mucosa fin al carcinom da la chavorgia da la bucca.

Fimaders cun dapli che 20 cigarettas al di mussan cleramain dapli recessiuns da la schunschiva che nunfimaders. Pervia da la resistenza reducida è tar fimaders era l’ur da la schunschiva pli fragil, per exempel envers l’effect mecanic da las setlas d’in barschun da dents.

Pervia dal provediment da sang pli flaivel da la schunschiva tar fimaders en general na duessan là vegnir exequids nagins tractaments chirurgics. Pir suenter in stop da fimar realisà cun success po la cuvrida chirurgica eventualmain adattada da las surfatschas da la ragisch libras vegnir attatgada.

Ultra dal tabac da snuffar è il tabac da mastgar la furma la pli frequenta dal consum da tabac senza fum. Il tabac da mastgar vegn mess en furma libra u pachetà en satgets sut la levza sura e vegn uschia en contact cun la mucosa da la bucca. Latiers dat il tabac ultra da sia nicotina era giu substanzas tossicas che pon era esser cancerogenas.

Tras l’effect da la nicotina sa sviluppa l’effect da dependenza dal tabac da mastgar. Ils consuments vegnan uschia fatgs dependents.

Il tabac da mastgar chaschuna in’irritaziun da la mucosa da la bucca sco era recessiuns da la schunschiva. Las irritaziuns pon svanir puspè suenter avair smess cun il tabac da mastgar. Las recessiuns da la schunschiva restan dentant era suenter il stop dal consum e ston perquai, sche necessari, vegnir tractadas chirurgicamain.

Giugar savens cun piercings è ina disa che po avair effects nuschaivels sin ils dents e la schunschiva. Var 80 pertschient da las purtadras e dals purtaders mussan en ils lieus da contact correspundents era ina perdita da la substanza dira dals dents sezza ed en 25% dals cas sa mussan era recessiuns da la schunschiva.

Suenter avair allontanà ils piercings resta la recessiun da la schunschiva respectiva e sto perquai, sche las circumstanzas pretendan quai, vegnir tractada chirurgicamain.

Suenter il tractament d’ina parodontitis observ’ins per regla ina sminuziun da la schunschiva. Quella è dentant giavischada tar il tractament parodontal, perquai che las tastgas da la schunschiva nungiavischadas pon guarir tras la reducziun da l’ur da la schunschiva.

Cuntrari a las recessiuns da la schunschiva tar pertutgads senza parodontitis na pon las reducziuns che resultan durant la guariziun da la schunschiva betg vegnir revocadas.